Saltar al menú principal
Saltar al contenido

Geografia eta mapak

Geografiaren Errege Elkartearen funtsa

Eskuz egindako Espainiako mapa, 1739 eta 1743 urteen artean egindakoa

Eskuz egindako Espainiako mapa, 1739 eta 1743 urteen artean egindakoa

Geografiaren Errege Elkartearen Liburutegia (1876an sortu zen Elkartearekin batera) Espainiako Liburutegi Nazionalera eraman zen 1971n, sute baten ondorioz jatorrizko instalazioak hondatuta zeudelako, eta hala Liburutegia hautatu zen kalitatezko behin betiko gordailu moduan. Biblioteka espezializatu paregabea da; 5.000 liburu baino gehiago ditu, 8.000 liburuxka inguru eta aldizkari-bilduma bat, bai Espainiakoak bai atzerrikoak, 1.120 izenburu baino gehiagorekin. Espezializatuta dago geografia orokor eta historikoan, geologian, kartografian, topografian eta bidaia- eta aurkikuntza-liburuetan.

Gainera, kartoteka bat ere badu, zortzi mila mapa baino gehiagorekin; mapa batzuk XVII eta XVIII. mendekoak dira, funtsean kartotekak XIX. mendeko eta XX. mende hasierako kartografia barne hartzen badu ere. Mapa horien artean dago eskuz egindako eta dagoen eredu bakarra den Espainiako mapa ikusgarria, XVIII. mende hasieran Ensenadako markesak Carlos Martínez eta Claudio de la Vega jesuitei egitea eskatu ziena; gutxi gorabehera 1:440.000 eskalakoa da, eta 1739 eta 1743 urteen artean egin zen. Espainiako kartografiaren historiarako pieza garrantzitsua da, Espainiako lehenengo mapa zehatz eta handia baita, eta ordura arte egindako bikainena.

Geografiaren Errege Elkartea Espainiako geografia-elkarte zaharrena da. Madrilgo Geografia Elkartea izenpean sortu zen 1876an, Europako beste herrialde batzuen ereduari jarraituz, nazioen arteko harremana, kolonien zabalkundea, deskubrimenduak eta, azken batean, Geografia bera herrialdeen eta Estatuen lehentasunezko zeregin bezala ulertzen ziren garaiko joera eta ideiak oinarri. 1901ean Errege titulua lortu eta Geografiaren Errege Elkartea izena ipini zitzaion. Helburu nagusi zituen, batik bat, Espainiako eta hari historikoki lotzen zitzaizkion herrialdeetako ezagutza geografikoen ikerketa, azterketa eta hedapena.

Gaur egun, elkarteko bazkideak, bereziki, eremu akademikoetakoak, irakasleak eta teknikariak dira, guztiek ere gure munduko egoera geografikoen inguruko jakin-mina eta interesa izaki. Elkarteak bere izena daraman buletin bat argitaratzen du sortu zenetik; Espainiako geografia-aldizkarietan lehenengoa eta zaharrena da.

Geografiaren Errege Elkartea zuzendu eta ordezkatzen duen organoa Zuzendaritza Batzordea da, eta hauek dira bertako kideak: presidente bat, lau presidenteorde, idazkari nagusi bat, bi idazkari-laguntzaile, diruzain bat, liburuzain bat eta hogeita lau batzordekide. Batzordeko kideek, gaika antolatzen diren komisioetan parte hartuz, Elkartearen ekintzak burutzen dituzte urtero. Zuzendaritza Batzordean berezko sei batzordekide ere badaude, erakunde hauetako zuzendari direnak: Geografiaren Institutu Nazionala, Ozeanografiaren Espainiako Institutua, Geo-meatzaritzako Institutu Teknologikoa, Armadaren Geografia Zentroa eta Ikerketa Zientifikoen Goi Kontseiluaren Ekonomia eta Geografia Institutua, eta Juan Vilá Valentí irakaslea.

Zuzendaritza Batzordeak aho batez erabaki zuen Espainiako Liburutegi Nazionalari berezko batzordekide titulua ematea 2012ko apirilaren 25ean, Liburutegiko funts dokumental eta kartografikoak zaintzeko, gordetzeko eta zabaltzeko.