Saltar al menú principal
Saltar al contenido

Bildumaren historia

1. Bildumaren historia

1868an, estatuak Valentín Carderera pintoreak bere bizi osoan bildutako grabatuen, marrazkien eta liburuen bilduma eskuratu zuen eta Liburutegi Nazionalera bideratu zuen. Horren harira sortu zen Estanpen Aretoa, lan horiek eta Liburutegian sakabanatuta zeuden genero horretako lanak gordetzeko. Carderera funts horretan gorde ziren estanpa solteak eta garai bateko Errege Liburutegian zeuden grabatudun liburuetan zeudenak.

1880an José María Galváni marrazki sorta bat eta bere estanpa ezagunenen egoera-probak erosi zitzaizkion. Urte berean, Manuel Castellano pintorearen iloba eta oinordekoak Castellano bildumagile handiarenak izandako sei mila grabatu inguru saldu zizkion Liburutegiari. 1904an Eugenio Izquierdok Parisen erositako Izquierdo Bildumako grabatudun estanpak eta liburuak iritsi ziren Liburutegira.

Badira beste dohaintza garrantzitsu batzuk ere; besteak beste, Ricardo Barojak 1910ean dohaintzan emandako grabatuak eta 1951n Mariano Fortuny Madrazoren alargunak Liburutegi Nazionalari emandako karpeta, senarraren grabatuak biltzen zituena eta Mariano Fortuny Marsalen beste bat, lehenengoaren estanpekin.
1968an, Juan Sedó Peris Mencheta bildumagilearen liburutegiarekin batera, Cervantesen inguruko gaien marrazkiak eta grabatuak erosi zitzaizkion. 1975ean, deboziozko estanpa garrantzitsuak iritsi ziren Atal honetara: Florentino Zamorak dohaintzan emandakoa eta Isidro Albert hildakoan erositakoa.

Hurrengo urtean, 1976an, Calcografía Nacional erakundeak artista garaikideen ehun estanpa inguru entregatu zituen. Honako artista hauenak, besteak beste: Cuní, Echauz, Prieto Nespereira, Marcoida, eta abar. Aldi berean, antzinako grabatuak erosten jarraitu zuen: 1963an, XIX. mendeko 125 estanpa japoniar, 1985ean Piranesiren "Camere sepolcrali degli antichi" eta Alfred Guesdonen "L´Espagne a vol d´oiseau", 1986an Goyaren "Los Proverbios" lanaren bigarren edizioa eta "Los Desastres" lanaren zazpigarrena, 1988an "Los Caprichos" lanaren bosgarren eta hamargarren edizioak eta abar. Era berean, artista garaikideen grabatuak ere erosi ziren, Picasso, Dalí, Miró, Tàpies, Chillida, Millares, Alberti eta beste hainbaten lanak izanik aipagarrienak.

Lege-gordailuaren bidez, grabatudun jatorrizko liburu edo album garrantzitsuak eskuratu dira; horietatik aipatzeko modukoak dira Picassoren "Tauromaquia", Joan Mirók ilustratutako "Cantic al Sol", A. Machadoren "Caminos", Redondelak ilustratua, Pelayok ilustratutako "La vida del Lazarillo", Albertiren "Variaciones sobre el Entierro del Conde de Orgaz", Solanaren "Aguafuertes", eta abar. Grabatzaile askok ere dohaintza garrantzitsuak egin dituzte eta horri esker, Liburutegi Nazionalak, une honetan, Espainiako grabatu garaikideen bilduma garrantzitsua du. Bilduma hazten ari da, artistek eta bildumagileek egiten dituzten dohaintzei, errepikatutako aleekin egindako trukeei, lege-gordailuaren bidez eskuratutako lanei eta mota guztietako material grafiko zahar eta modernoen eskurapenei esker.

2. Funtsak

Liburutegi Nazionaleko jatorrizko grabatuen bilduma, zalantzarik gabe, herrialdeko garrantzitsuenetakoa da, duen pieza kopuruagatik eta horien kalitateagatik. Marrazkien eta Grabatuen Zerbitzuan 100.000 estanpa solte eta liburuetan txertatutako 600.000 grabatu daude, Eskuizkribuen, Inkunableen eta Arraroen Zerbitzuan eta Liburutegiko Areto Orokorren Zerbitzuan daudenak aintzat hartu gabe.

Grabatu-eskola ia denak ordezkatuta daude; batez ere, Espainiakoak, XV. mendetik honainoko lanekin, izan ere bilduma bizia da eta etengabe ari da hazten. Hainbat tokitako estanpa eta liburu ilustratuak daude: alemanak, flandestarrak, holandarrak, italiarrak, frantziarrak, ingelesak, portugaldarrak, eta baita japoniarrak ere; horien artean aipagarriak dira Ribera, Goya, Fortuny, Picasso, Durero, Cranach, Rembrandt, Piranesi, Tiepolo, Callot, Nanteuil eta beste hainbat artisten lanak.

Gaiak askotarikoak dira: atal garrantzitsua osatzen dute estanpa erlijioso eta mitologikoek, historikoek, koadroak erreproduzitzen dituzten grabatuek, hirietako eta paisaietako bistek; arkitekturak eta ornamentazioak, motek eta trajeek, erretratuek, generozko eszenek eta abar.