Europako liburutegi nazionaletako zuzendarien foro informal gisa sortu zen Europako Liburutegi Nazionaletako Zuzendarien Konferentzia Fundazioa. 1998. urteaz geroztik, fundazio independente bat da, Europako Batzordeko estatu kideetako liburutegi nazionaletako zuzendariak biltzen dituena. Gaur egun, 43 herrialdetako 45 kidek osatzen dute fundazioa.
Bilera bat egin ohi dute urtero, proiektuak —lankidetza proiektuak, guztiak ere— eta jardunbide lerroak proposatzeko.
Honako hauek dira fundazioaren helburu nagusiak:
- Liburutegi nazionalek Europan duten betekizuna hobetzea eta sendotzea
- Zerbitzu bibliografiko nazionalak indartzea
- Haien arteko eta erakundeekiko lankidetza sustatzea, erabiltzaileek sarbidea ziurtaturik izan dezaten
- Informazio sare eraginkor bat sortzea eta hari eustea
- Liburutegiei buruzko estatu politikak egokitzea eta berritzea
- Liburutegietan informazioaren teknologia berriak abiaraztea
- Europa mailan komunikazio interfazeak arautzea
- Europako bilduma garrantzitsuak zaintzea eta gordetzea
Fundazioaren baitan, batzorde iraunkor batek egiten du herrialdeen arteko edo nazioarteko erakundeekiko lankidetza proiektuen jarraipena eta kontrola. Lankidetza proiektuetan, honako gai hauek jorratzen dituzte: hainbat hizkuntza erabiliz funtsak kontsultatu ahal izatea, eta informazioa hedatzeko eta kudeatzeko teknologia tresna berriak eta liburutegi digitalak garabidean jartzea .
CENLk babestutako proiektuen artean, nabarmena da The European Library, Europako liburutegi nazional guztietako funtsak kontsultatzeko sarbidea ematen duen atari bat baita.
Catálogo
