Deles tomouse esta denominación pola unión das palabras (“Por” e “Con”) que, tipográficamente destacadas, aparecen nas portadas deste impresos para introducir a cada unha das partes (litigante e demandado). Son impresos de índole xurídico-administrativa e constitúen o produto editorial que hoxe en día se conserva en maior número.

Moitos destes preitos tratan sobre cuestións hereditarias (mayorazgos, vínculos e sucesións), así como de fidalguías e outros asuntos relacionados cos dereitos de nobreza. No seu conxunto, son un reflexo da historia política, social e económica, detallada a través dos preitos que establecían os diferentes estamentos sociais e, como tales, importante obxecto de estudo para o período histórico que abarcan.